قصة : بنات الليل .

قصة : بنات الليل

البارت 1 : زينب: .... مريم مريم نوضي أ صاحبتي راه 5 ديال العشية هادي
مريم:5 دقايق و نوض
زينب : وا فيقي ولا غنخوي عليك الماء
مريم: الصباح هدا مالك على هدا النكير
زينب : يالاه وا غير نوضي
مريم ناضت و تقادات فبلاصتها و شعلات سيجارة و زينب مشات جابت ليها كأس القهوة و ريحات حداها ...
زينب: شوفي أنا راه غنمشي لحمام دبا بغيتي تمشي نوضي تهزي مابغيتيش راه ماغنبقاش بوسخي على قبلك
مريم: ناري خلي حتى لغدا ونمشيو عيانة دبا ندوشو غير فالدار كيف العادة
زينب : أنا راه ماغنبقاش تابعاك كل نهار ليوم غدا ليوم غدا أنا غنمشي دبا بغيتي تمشي مرحبا مابغيتيش عاودي لراسك ( زينب ناضت بدات كتجمع فحوايج الحمام )
مريم: صافي هأنا غنوض و ماكاينش فقلبك الرحمة و لا الشفقة كنقول ليك عيانا و نتي ماعلابالكش ...
زينب: راك ما غتهزي ما غتحطي راه الكسالة كدير كلشي
مريم: صافي سكتينا .. جمعتي الدوزان ديال الحمام (الخرقة و الصابون و الشامبوان إلخ..)
زينب : أه كلشي مجموع خاصك غير دردبي قدامي
لبسو البنات جلالبهم و مشاو الحمام ... إوا على مايخرجو من الحمام نعاود ليكم قصتهم
زينب 24 عام زوينة و بيضة و لاطاي حوتة العوينات عسلييين و الشعر أكاجو ...
مريم 24 عام فسرة و بيضة و لاطاي عامرة شوية ما قصيرة ما طويلة العوينات بلا ما ندويو عليهم الشعر كحل كيلمع ...
زينب و مريم كانو عايشين فالعروبية و تما عندهم البنت كتوصل لسادس ماكتبقاش تقرى كيحبسوها حتى يجي لي يتزوج بيها مريم وزينب كانو صحابات من الصغر ما كيتفارقوش أي حاجة كيديروها بجوج ملي وصلو ل 17 عام زينب جا خطبها واحد الراجل قد جدها و هي مابغاتش و عيات ترغب فباها و والو قال ليها غتزوجي يعني غتزوجي مشات عند صاحبتها شكات عليها و هي تقول ليها مريم أش بان ليك نهربو ...يتبع

 

   تتمة قصة : بنات الليل 2