قصة بعنوان: قلبي يحترق

قصة بعنوان: قلبي يحترق

ج1:

بحال كل نهار " عبير" جالسة قدام البحر دايرة les écouteurs فودنيها وتتصنت لأغنية: يوم الوداع لجورج وسووف..

ودموعها نازلين كلما سمعات لهاد الاغنية..عمرها مملات ولا حاولات تنساه ..حيت كانت عارفة راسها مغتقدرش..

ومن حر الجرح اللي خلا ليها حبيبها قلبها كان كل نهار تيتحرق..

عبير قبل 4 سنين مكانتش هاكة ..كانت بنت كلها حيوية وفرح..كان عندها 18 عام يله شادة الباك وفرحانة بيه وقررات تدير واحد المدرسة ديال الهندسة بالفلوس..حيت باباها كان ميسور وكان باستطاعتو يقريها احسن قراية..

كانت عايشة فمستوى زوين..عايشة فڤيلا..وهي وحيدة واليديها..كانت عندهم بحال شي جوهرة لدرجة انهم متيخسروش ليها خاطرها فتاحاجة..

المهم..دوزات عطلة الصيف مخيرة اللي حلات عليها فمها تحضر خصوصا انها فرحاتهم بالباك..

ومن بعد الصيف تسجلات فمدرسة المهنديسين..اللي اختارتها بنفسها..كانت فرحتها لا توصف ومن الفرحة تتنقز وغير تدور وتبوس فباها ومها..وتضحك..

وباها يوسف كان فرحااان ..

يوسف: يا هاد البنت باراكة..هههه

عبير: بابا الحبيب خليني ننقز راه الفرحة اللي دايرة لي هاكة هههه

يوسف : واخا أبنتي خودي راحتك على انا كرهت نشوف بنتي مرتاحة وفرحانة..

(وهنا تدخلات ماماها سمية):.

سمية: أجي عندي أعبير..اجي ابنتي..(جات عندها عبير وعنقاتها) الله يخليك ديما فرحانة أبنتي ..نتي أغلى حاجة عندنا انا وباباك وعمرنا منقدرو نستحملو نشوفووك كتعدبي ولا ممرتاحاش فحياتك..طولما نتي فرحانة حنا مرتاحين وقلبنا هاني عليك..

عبير: لهلا يخطيكم عليا(عنقات باباها وماماها وغمضات عينيها)

المهم من بعد 3 يام من التسجال بدات القراية ..وتماك تعرفات على نهى في المقهى الخاص بالمدرسة كانت بنت زوينة بزاااف واجمل مافيها عينيها حتى عبير بنت زوينة ولكن نهى بنت اللي تتخطف الانظار..

المهم عبير ونهى ولاو صحابات وولاو متيتفرقوش..نهى كانت عندها طونوبيلة يله خداها ليها باباها بمناسبة النجاح ديالها..

اما عبير كانت تتجي غير فالطاكسيات في الاول من بعد ولات تتوصلها نهى..

المهم بداو الدراسة ..عبير كانت متحمسة وقررات انها تدير مجهودها كامل باش تولي مهندسة..

المهم واحد النهار دازت نهى عند عبير للدار باش يمشيو بجوج للمدرسة..

وفاش وصلو مشاو للمقهى فطرو تماك وكل وحدة دخلت على الفصل ديالها..

دخلات عبير تقرى وبقات هي وزملاءها تيتسناو ف الاستاذ يجي اللي تعطل داك النهار..وفاش دخل ..اول ماهزات عبير راسها. ماعرفاتش باش تبلات..

كان قدامها شاب ف اواخر العشرينات زوين وباينة عليه شخصية...عبير تغرمت بيه فالبلاصة بلا متقدر تحبس داك الشعور..كان هذا اول حب فحياتها..شداتها السخانة وتتحس بقلبها غيسكت وحاولات متبينش..ارتابكت لواحد الدرجة كبيرة ومبقات عرفت مادير..المهم هو اعتادر على التأخير ديالو وبدا مباشرة بالتعريف براسو..

الاستاذ: معاكم الدكتور رضا انا هو اللي غنقريكم طول هاد المدة..كنتمنى نتفاهمو..

مللي سالا التعريف براسو طلب من الطلبة كل واحد يعرف براسو ..

حتى وصلات نوبة عبير..يتبع..

ج2: عبير: أ..أنا عبير 18 عام خديت الباك هاد العام و و و جيت هنا.. رضا: ههههه واخا الالة عبير..مالك مرتابكة؟؟ متخافيش ودوي بكل حرية.. المهم دازت سيمانة هكاك و عبير كل نهار تيزداد إعجابها بأستاذها كثر وكثر.. وبدات تتلاحظ باللي حتى هو تيميل ليها وتيعاملها معاملة خاصة ..بالمقارنة مع زملاءها.. وفهاد اللحظة قررات تجبد الموضوع مع نهى وتشوف شنو رأيها: نهى: حبيبة صاڤا؟؟ بديتي تتولفي جو المدرسة ولا مازال؟ انا بعدا ولفت.. عبير: أه الصراحة ولفت ومتنسايش انك نتي مونساني..وبزاف راكي عارفة انا معندي حد من غيرك لا خوت لا صحابات.. نهى: تانتي احبيبة مونساني انا واخا عندي ختي مكنتفاهمش معاها تتعصبني عقلية مريضة عندها.. عبير: هههه ياكما تتناتفو هههه.. نهى: لا لا هههه ماشي تالديك الدرجة هههه.. عبير: نهى؛؛؛ختي..بغيت نسولك.. نهى: اه سولي.. عبير: تيقريك الاستاذ رضا..؟؟ نهى: هداك البوكوص هههه..اه تيقريني علاش تتسولي؟؟؟ عبير: اختي اش غنقوليك..تيعجبني والله ومعرفتش شنو ندير باش يديها في.. نهى: أهاااه..هههه الناس عاوتاني.. عبير: متضحكيش عليا..را ختك طااايحة نهى:اوا بينيلو..ويلا كان باغيك غادي يهضر هو معاك..غير تهناي.. عبير: كنتمنى..هو الصراحة تيعاملني معاملة خاصة..واش حيت تنقرا عندو مزيان او شي حاجة خرا هادشي اللي بغيت نتأكد منو.. نهى: اوك..ديري قضية فاش تسالي الحصة ديري راسك مافاهماش شي حاجة فالدرس وسيري عندو سوليه ويلا كان تتعجبيه غينتاهز الفرصة وغيقوليك شي حاجة. اوكي؟؟ عبير: ممممم صافي واخا مشااات .. المهم داكشي اللي دارت عبير.. واحد النهار من بعد الحصة مشات عندو عبير: أستاذ رضا..أستاذ رضا. سمحلي واحد الدقيقة عافاك.. رضا: نعم..تفضلي عبير.. عبير: شرحتي لينا قبيلة واحد الشكل هندسي ولكن انا مفهمتش فيه شي حوايج ممكن لا عندك الوقت تشرحولي دابا؟؟؟.. رضا: واخا ميكونش عندي الوقت نكونو على قبلك نتي.. هنا عبير ولات تترعد وقلبها تيترعد معاها معرفتها فرحة ولا خلعة..اللي ماكانتش عارفاه هو هذا هو " الحب " عبير: ( ابتاسمات وكلها حشمة وتزنكات)واخا هااللي مفهمتش..(بدات تتوريه شي مفاهيم..) رضا:(شرحليها داكشي)صافي دابا واضح؟؟؟ عبير: واضح..وضوح الشمس.. رضا: كنتمنى يكون وضاحليك حتى اعجابي بيك وضوح الشمس!! عبير: أ...أأ مف..مفهمتش ش..شنو تتقصد رضا: نتي تتعجبيني بزاف..من اول نهار شفتك فيه وصورتك متتفارقنيش..انت عارف باللي هادشي مخصوش يكون ولكن انا قلبي منقدررش نتحكم فيه.. عبير: معرفتش شنو غنقوليك ااستاذ.. رضا: ممكن بعدا تعيطيلي رضا..؟ عبير: رضا هههه صافي.. رضا: صافي..يله نوصلك ونديرو قهيوة عبير: واخا..يله.. المهم مشاو عبير ورضا يديرو قهيوة وتماك اعتارفات ليه تاهي باعجابها الشديد ليه ..وهنا بدات قصة حب عبير لرضا

ج3: رضا: عبير..!! بما اننا بدينا دابا هاد العلاقة..نبغي اولا تكون هاد العلاقة سرية بيني وبينك باش الطلبة ميبقاوش يهضرو فينا و ينعتو عليك او يقولو غنزيدك النقاط او حاجة هاكة واخا؟! عبير: كوون هاني..ميكون غير خاطرك.. وهاكة بقات علاقتهم في السر تيخرجو مفارقين من المدرسة وكيتلاقاو فواحد القهيوة موالفين يتلاقاو فيها.. عبير كانت غتسخف بالفرحة ..حيت تصاحبات مع فارس احلامها..وتتعيش اول حب فحياتها.. وقالت خاصني نقولها لنهى نفرحها معايا...ومللي تلاقاتها : نهى: مالك تتفرنسي..هههه عينيك ضاحكين فرحينا معاك.. عبير: اش غنقوليك واخا الصراحة هادشي سري للغاية ولكن نتي صاحبتي وختي مخاصني نخبي عليك والو.. نهى: واطلقينا للفراجة هههه عبير: رضا!! نهى: مالو ؟ عبير: رضا تاهو صدق تيبغيني او تنعجبو نهى: مممممم اوااا الناس..اوا ههه؟ عبير: تصاحبنا ههه نهى: وينوووو مبروك لعgوبة لشي خطبة عبير: ان شاء الله اختي فحياتك .. المهم كان حب عبير ل رضا كيزداد يوم على يوم لدرجة ولى حب جنوني..مبقاتش تتقدر تتصور حياتها بلا بيه وهو لاحظ هادشي..كانت تتنعس على سميتو وتفيق على سميتو..الحصة اللي تدوزها عندو كانت تتحس براسها بحال شي واحد جالس فشي جردة زوينة بزاف وتيسمع موسيقى مريحة..هاد الموسيقى كانت عندها هي الشرح ديالو.. المهم بقات علاقتهم مستقرة شي عام هكاك و رضا عمرو ذكر عليها حس الزواج او حس الخطبة.. داك العام دوزوه مزيان تيتلاقاو تيخرجو وصافي..ومن بعد داك العام تلاقاو كيف ديما فالقهيوة ديالهم..: رضا: شفتي هاهي بدات الدراسة ثاني.. عبير: اه احبيبي فرحت بزاف حيت غنبقا نشوفك تاني كل نهار..توحشتك هاد الصيف داز عندي كحل ههه رضا: تا أنا احبيبة.. عبير: انت اللي طلعات ليك هههه فوجتي مع راسك.. رضا: ضروري باش ندخلو en forme للخدمة تاني.. عبير: بصحة حبيبي.. رضا: عبير ؟!! نتي عارفاني شحال تنبغيك..ياك؟؟ عبير: حتى انا تنموت فيك.. رضا: وكتثيقي في؟ عبير: بزاااااااف.. رضا: وانا تنبغيك وتنتيق فيك..وحبي ليك مكيخلينيش نستحمل نشوفك قدامي ومنقيسكش.. عبير: مفهمتش..!! رضا:الصراحة انا مكرهتش نحس بيك كتر من هكا..زعما ندير معاك علاقة جنسية.. عبير:(عبير وقفات مصدومة)سمحلي منقدرش..انا واخا تنبغيك منقدرش نغضب الله بشي حاجة هاكة..نهار تكون حلالي واخا.. رضا:(رضا واخا معجبوش الحال ولكن مبينش)صافي احبيبة تانا منقدرش نبزز عليك شي حاجة نتي ماباغياهاش.. المهم من داك النهار معمرو عاود طلب منها شي طلب هكاك .. بقات علاقتهم مستقرة بحال ديما تيتلاقاو وكلشي..وداز العام التاني كيف ما داز العام الاول وعبير متنازلاتش على موقفها ان علاقتهم تبقى نقية وبريئة.. واحد النهار خرج رضا مع شي صحابو تيعرفهم وواحد فيهم صاحبو الروح بالروح وهو اللي كان تيعاود ليه كلشي عليه..هاد صاحبو سميتو يحيى.. يحيى: إوا أصاحبي فين وصلتي مع بنت دارهم هههه؟ رضا: هانا اخويا باقي داير ليها خاطرها يحيى: باقي مرطابتش؟؟ رضا: لا باقي واصلا ترطاب ولا مترطابش سوقها هداك..انا باقي معاها غير حيت تتبغيني وماباغيش نصدمها لاتصدق مخليا القراية..اما انا عايش حياتي بعيد عليها ..را ميمكنش نبقا انا محنسر تتبغي هي على خاطرها. .. يحيى: ومتتفكرش تتزوج بيها؟؟مدام هي نقية ونت اول واحد عرفات؟؟. رضا:الصراحة لا عمرني فكرت..فالاول عجبتني حيت زوينة وفرمتها زوينة قلت ارا نديرو لبيع وشرا مع هاد البنت انا ناخد منها المتعة..وهي النقاط..الساعة هاد البلان مصدقش

ج4: يحيى: دبر راسك بنت بحال هادي قليل تصادفها ... رضا: تانتا..انا اصلا متنفكرش فالزواج.. يحيى: على خاطرك..اوا شدارت البارصة اصاحبي.. رضا: نسولوك نتا .. المهم بقاو تيهضرو على الكورة..ومللي سالاو وكان غادي فحالو. عيط ل عبير سول فيها ومشا فحالو.. بقاو على هاد الحال 3 سنين هي صافي حبو مشا ليها مع العروق وكان تيبين ليها باللي تيبغيها وباللي تيخاف عليها حتى من راسو على امل يجي شي نهار وتسلم ليه راسها..لكن هي كانت مربية و معمرها مقدرات تدير ديك الفعلة وتخون ثقة واليديها فيها وكانت تتقول مللي غنتزوجو غيكون داكشي..كانت ميقنة باللي رضا تيبغيها وعمرو يغدر بيها.. المهم ...واحد النهار كانت عطلة عبير حسات بالملل والقنط..واتاصلات ب رضا قالتلو باغا نشوفك. .راني قنطانة..قاليها : رضا: سمحيلي بزاف احبيبة والله راه عندي واحد الغرض ضروري ليوم غدا نشوفك.. عبير: واخا حبيبي..صافي ماشي مشكل عبير هنا اتاصلات بنهى وطلبت منها نفس الطلب لكن نهى عتاذرات ليها وقالت ليها باللي را هي مسافرة مع ختها للرباط ومغيجيو تالغدا.. وهنا قررات عبير تخرج بوحدها تتمشا وتدير..shopping .. لبسات وخرجات..كانت الساعة 18:00.. مشات لشي محلات تقدات شي حوايج وبقات تتمشى شوية حتى وصلات لحدا واحد القهوة وهي تتفاجأ مللي شافت طونوبيلة نهى قدامها..وبقات تتساءل: عبير: العجب! هاد الطونوبيل بحال ديال نهى..أوأوو..لا راها ماشي بحالها راها هي نيت..علاش زعما غتكون كدبات عليا وقالتلي راها مسافرة..!!المهم تدبر راسها انا مالي..نمشي فحالي حسن.. يله بغات تمشي فحالها..وهي تخرج نهى من ديك القهوة وضحكتها عالية ومعاها شاب.. دارت جيهتها عبير وبدات تتبتسم.. عبير: مسخوطة هاد نهى..دايرة علاقة وماقالتلي والو وانا النهار كللو وانا تنعاود ليها عليا وعلى رضا..ههه واخا فيها.. ماجات فين تكمل عبير هضرتها حتى حققات فالشاب لقاتو رضا.. نهى ورضا..!!!مشادين بليدين وخارجين من القهوة وتيضحكو.. عبير فهاد اللحظة مفهمت والو..ومقدرتش تيق..ومشات عندهم.. عبير: أ..أ..ر..رضا!! نهى..!!!مفهمتش..!! رضا سكت وهدر راسو معرف مايقول.. نهى: عبيير..أنا.. عبير: والله مفهمت..شنو معنات هادشي.. علاش مقلتوليش خارجين نخرجو مجموعين؟؟علاش كدبتو عليا وقلتو لي شي عندو غراض. شي مسافر..مالكم ساكتين شي حد يفسر لي!!!!!!! نهى:أ..أ.. عبير: زعما ممكن تكونو غدرتوني..و..وو..بيناتكم علاقة زعما!!!لاا لا ميمكنش..منظنش حب حياتي واعز صديقة عندي يديرو في هاكة .. رضا: پففففففف ..عبير صافي عفاك..بغيتي تعرفي شنو كاين..؟؟؟انا ونهى تنبغيو بعضياتنا و على علاقة..صافي دابا فهمتي شنو واقع!؟؟ عبير تصدمات صدمة كبيرة بزاااف ومازادت حتى كلمة لاحت الميكات اللي كانو فيديها ومشات تتجري ماعارفاش فين غاديا..مللي عيات وقفات تتنهج وتتبكي..لقات راسها قدام البحر وقفات وبقات تتغوت خصوصا ان البحر كان خاوي.. عبير: علاااااااااش...علاش انا ؟؟؟؟واعلاااااااش جاوبني...شنو درت انا شنو؟؟؟ حتايديرو لي هادشي صاحبتي وحبيبي..واو شحال كنت مكلخة فاش ظنيت باللي الحب الطاهر والصادق باقي..وأنو باقي رجال اللي تيبغيو المرا لذاتها ماشي لجسمها.. بقات عبير تتشكي وتبكي حتى عيات وعطاتها للبكا.. شوية بدا تيتاصل بيها رضا هو ونهى.. ماجاوباتهمش..وطفات التلفون.. مللي مشات للدار لقات نهى تتسناها قدام الدار وخرجت من الطونوبيل وتتقول: نهى: عبير عافاك تسناي وسمعيني مزيان عبير: (دفعاتها وزادت)عطيني اتساع الله يحفظك راهو خليتو ليك..اولا نقول احسن خطفتيه الله يعاونك معاه..خليوني عليكم فاتقار.. نهى: والله حتى غتسمعيني 

ج5: عبير: واخا ..تنسمعك غير بالزربة عافاك عندي ميدار.. نهى: نتي عندك الحق فكلشي انا مصدقتش وحتى رضا مصدقش ولكن هادشي ماشي بيدينا ..حاولنا ومقدرناش..نتي بكثرة مشكرتيه بغيتو بلا منحس..ومع ذلك مدرت حتى خطوة حتى دارها هو..نتي عارفاه تيقريني حتى انا وهو مقدرش يخفي اعجابو بي ومللي جا عندي هو مقدرتش نقاومو خصوصا مللي طلب مني الزواج نيشان ومللي قلتلو باللي انت مع صاحبتي وكدا قاللي انا صحبتك عجبتني في الاول ولكن مللي خرجت معاها كتر من مرة معجبتنيش شخصيتها داكشي لاش مقدرتش نبغيها ... عبير:(بنبرة حزينة وقلبها مجروح..)مبروك عليكم..باراكة عافاك مبقيتش قادرة نسمع كتر من هاكة.. نهى: المهم سمحيلي ..بسلامة.. دخلات عبير للدار وقلبها محروق على اللي وقع ليها..2 صدمات كانو قاسحين عليها..الراجل اللي بغات ووثقات فيه خانها ..والخيانة كانت مع أعز صديقة عندها..مللي دخلات للدار مقدرت تهضر مع حد..دخلت لبيتها وسدات عليها.. عبير عاشت صدمة اللي كبر من الطاقة ديالها..جاب الله دوك الايام عطلة حيت مبقاتش عندها الرغبة ولا الجهد للقراية وهاد الصدمة أثرت ليها على حياتها.. سالات العطلة وعبير مقدرتش ترجع للمدرسة وتشوف فوجه رضا ونهى اللي طعنوها فظهرها..بقات تتعاني من هاد الصدمة بزاااااف وبغات تخرج منها فحاولات تمشي تواجه ..وياريتها مامشاتش..غير دخلت للقسم وقبل ميدخل رضا يقريهم..بدات تتسمع فالبنات والدراري تيهضرو عليه وتيقولو باللي تزوج..مفهمتش واش بهاد السرعة دارها..وتسنات ..غير دخل.. رضا:( شافها ارتابك ومعرف ميدير..)السلام عليكم..عبير !! شحال ماجيتي تنتمنى تكوني بخير..(وجهو قاسح)،.. نقزات واحد الطالبة.. لمياء: أستاذ رضا..اوا مبروك عليك الزواج. .. عبير: (زادت صدمة على صدمة..كانت تتمنى النار اللي فقلبها تطفى لكنها عاد مازادت شعلات ...)مبروك استاذ رضا..انا جيت ليوم باش نقوليكم باللي عندي ظروف ومغنكملش القراية هنا..كنتمنى ليكم السعادة ا استاذ.. رضا: متخلي تاحاجة توقف ليك قدام حلمك تكوني مهنديسة.. عبير: أحلامي كلها تدمرات من بعد هاد الظروف..خليت ليكم الراحة.. رضا تأثر بزااف واخا هكاك وحس بأنو ظلم هاد البنت معاه ولكن مكانش قادر يحبس راسو انو يبغي نهى خصوصا انها فاتنة الجمال..وبنت عائلة.. سلمات عبير على زملاءها وخدات اجازتها ووراقها ومشات.. وصلات قدام البحر وجلسات تتشكي لو وهو تيسمع لها..عاوداتلو كلشي اللي ضارها..ومن داك النهار وهي تتمشي قدام البحر وتتشكيلو همها وتتبقى تتموسق قدامو.. داز عام وهي على هاد الحال مقدرت تكمل حياتها ومقدرت تنسا اللي أذاها ..جرح قلبها كان عمق من عمق البحر..ودموعها كانو على خدها كيف الموج لا ضرب في الصخر.. فهاد النهار عبير هاهي قدام البحر..كيف العادة ..واحد الوقت تتشوف واحد البنت تتجري جيهة البحر وتتبكي وتغوت وبدات غادية داخلة للبحر بحال الى باغا تنتحر..تبعتها عبير.. عبير: هيي ختي تسناااااي. ... البنت مسمعتش ليها كانت باينة محطمة...وصلات عليها وشداتها من يديها.. البنت: خليوني...خليوني علييييكم عبير: ختي عافاك..تاحاجة متستاهل تديري هادشي كاااامل.. البنت:(تلاحت على عبير وعنقاتها بحال شي واحد كان محتاج اللي يحن فيه ويواسيه..)غدر بي اختي..ثقت فيه وغدرني..انا مغنقدرش نستحمل هادشي ولا نعيش بلا بيه..اللهم نموت ونرتاح.. عبير: وشكون قاليك غترتاحي لمتتي؟؟ البنت:ولاش غنبقى عايشة.. عبير: ممكن نعرف شنو وقع ليك؟؟ البنت: انا غنعاود ليك كلشي..واكيد غتقوليلي موتك احسن من حياتك.

6: البنت:هادي عامين باش تعرفت على محسن..كان تيبانلي بحال شي ملاك فصورة إنسان واعدني من الاول بالزواج وتقت فيه وهادي 6 شهور..سلمت ليه راسي على اساس غادي نتزوجو هاد الصيف..ولكن غير وصل للي بغا طفا التلفون وبدل السكنة. بقيت نقلب ونتسنى ونقول لعل المانع خير..حتى لدابا تصدمت بخبر زواجو من بنت خالتو ومللي عرفتو فين كاين ومشيت عندو قاللي عطيني اتساع..وبقا يسب في ..دارلي الشوهة..تصدمت..اش غنقول لدارنا!! اش غندير فهاد الشوهة اللي درت لراسي..انا بعدا مالقيت حل من غير اني ننهي حياتي.. عبير:(هاد البنت حكات لعبير على الدبرة..وبدات تبكي..حيت تفكرت اش وقع معاها واخا هي ماناسياش..)آه قصتك بحال قصتي داكشي لاش انا هنا..ولكن انا مسلمتوش راسي واخا ألح بزااف..غير هو خانني وتزوج من صحبتي..المهم مديريش فبالك بلا منزيدك حتى همي..وكيف كيقولو " كون كان لخوخ كيداوي كون داوى راسو"..انا معندي باش نفعك حيت منافعاش راسي..ولكن اختي متقتليش راسك على ود هاد الحيوان..انا تنجي هنا باش ننسى ماداز عليا ونهار غنسى مغنبقاش نجي..حاولي تديري بحالي باش تنساي.. البنت:(تتبكي)انا مدمرة وبزاف ذنبي الوحيد اني بغيتو وتقت فيه..حيوان ولكن والله لابقات فيه. .ختي شكرا..وسمحيلي..والله ينتقم ليك ولي من اللي كان سباب فعذابنا.. عبير: آمييين.. سلمات عليها البنت ومشات..وعبير هنا تزادها شوية الأمل حيت عرفات باللي هي حافظات على راسها رغم كلشي..هو غدرها ولكن هي طلعات احسن منو.. بدات تتفكر بعقلها..وبطريقة خرى.. لقات أنو ميستاهلش حبها ليه.. لقات أنو أكبر أناني..شافتو فحياتها .. لقات أنو رضات الواليدين اللي خلاتها متستسلمش لنزواتو..وتضعف وتسايرو فما بغا.. لقات أنو تربية واليديها ليها خلاتها تفكر فيهم لاتحطات قدام الغلط ..اللي ممكن يبان ليها على أنو صح.. فكرااات وفكراات ولقات انها رابحة ماشي خاسرة.. جمعات عبير النوضة ومسحات دموعها..وقالت لااا انا مغاديش نضيع حياتي على ود واحد مايستاهلش دمعة مني..هو عايش حياتو وانا معذبة.. انا غنساااه واخا نعرف نفتح قلبي ونقلع حبو بيدي من جذورو.. المهم يوسف و سمية كانو شحااااال ماشافو ابتسامة بنتهم عبير..وكانو تيتسناوها بفارغ الصبر ترجع ليهم كيف مكانت..هوما معرفوش مالها تبدلات ولكن كانو حاسين انها تتعيش شي أزمة صعيبة عليها

ج7: حاولات عبير تتحدى راسها و ترجع حياتها كيف كانت..وأول حاجة فكرات فيها متنساش طموحها اللي هو تكون مهنديسة..رجعات للدار..وهي مبتاسمة وقالت لباها..: عبير: بابا الحبيب..عنقني راني توحشتك وتوحشت حنانك عليا.. يوسف:أجي أبنتي عندي الحمد لله مللي رجعتي لينا تضحكي ..مدة طويلة مشفناك هكا.. عبير: الحمد لله أبابا..انا غنرجع كيف كنت ان شاء الله غير كون هاني..فين ماما؟ يوسف: ماماك مشات تشوف جداتك عيانة شوية وغتجي العشية.. عبير: واخا أبابا..المهم بغيت نكمل القراية فشي مدرسة خرى من غير هاديك..غنكمل الماستر تما..واخا؟ يوسف: واخا أبنتي.. المهم دار ليها داكشي اللي بغات ومشات باش تكمل الماستر ديالها فمدرسة أخرى.. فاش بدا العام وجدات وراقها و الاجازة ديالها ومشات لواحد المدرسة حتى هي مزيانة ديال المهندسين..ومللي تسجلات..وبدات القراية..لقات قدامها صدمة مكانتش على البال..أول مادخلت للفصل ديالها..لقات الأستاذ اللي غيقريها واحد المادة هو نفسو رضا.. حتى هو تصدم فاش شافها..وعبير غير شافتو من الصدمة كلشي وقف ..الوقت وقف..التنفس وقف حتى من دقات قلبها وقفو..معرفات باش تبلات..غمضات عينيها وتفكرات اللحظة اللي شافتو هو ونهى خارجين مشادين من المقهى..تفكرات نهار عرفاتو تيبغي نهى وتزوجها..تفكرات كل الجروح اللي جرحهم ليها. وحتى بغات تنزل من عينيها دمعة وهي تقول فخاطرها: عبير: (حتى هاد الدمعة غالية عليك..منزلهاش على ود واحد بحالك) ..حلات عينيها وقررات تكون قوى من اللي غيظنو هو فيها.. شافت فيه شوفة احتقار..ومتسوقاتش ليه..وبدا هو تيتلعتم ومعرف مايقول وهو يعتذر على الحصة وخرج.. ناضو كلشي خرجو الطلبة..وحتى عبير خرجاات. .وماكان عندها والو وقالت غتمشي للدار. .. غير خرجات من المدرسة لقاتو قدامها.. رضا: عبير ..تسناي.. عبير: أستاذ..بغيتيني(شافت فيه نظرة كلها ثقة بالنفس) رضا: تبدلتي بزااااف.. عبير: أنا هي أنا أأستاذ..غير الضربة اللي مكتقتلكش تتقويك..انا دابا مابقيتش ساذجة هادشي اللي تبدل في..وليت تنشوف الناس على حقيقتها..باراكة اللي داز علي ماشي قليل..المهم خلينا مني..شنو باغي ؟؟ رضا: بغيتك..بغيتك تسمحي لي..من قلبك..انا تنتعدب وحياتي جحيم..أه كنبغي نهى ولكن بسباب اللي درت ليك مسعيدش معاها.. عبير: اوا انا مالي حياتكم هاديك.. رضا: الى سامحتيني و ورجعنا اصدقاء انا غنرتاح. عبير: أصدقاء!!!!. ههههههه والله حتى ضحكتيني..وبزااااف.. رضا: عافاك أعبير سمحي لي..غلطت فحقك..كنت تنفكر فيك كفريسة..وظلمتك معاييااا.. عبير: هداك النهار هو اللي عمرك تحلم بيه أأستاذ رضا..عمرني غنسمح ليك لا نت لا نهى..ودابا بسلامة.. رضا: عبير..لا تسناي.. مشات وخلاتو..واقف فبلاصتو وماد ايديه.. المهم دازت 3 شهور و عبير ديما تتعامل بنفس الجفاء..معاه و هو ديما فنما تيلقى فرصة تيهضر معاها باش تسمح ليه حيت تيحس بالذنب وهي متتبغيش.. بالسيف. مادازش عليها القليل..وجرحهم ليها كان عمق من البحار.. المهم من بعد ديك 3 شهور ديال القراية

ج8: دخلات للقسم عندو نيت..ولقات الكل تيبارك ليه..مفهمت والو..شوية وهي تعرف باللي نهى حاملة.. حسات بقلبها ضرها ولكن مابغاتش تضرب كلشي ف 0 وترجع للور..حاولات تبتاسم..ومشات لعندو بكل ثقة وقالتلو مبروك عليكم أأستاذ رضا..يتربا فعزكم رضا بقا تيشوف فيها..وهاد البرود ديالها معاه زاد من عذاب الضمير عندو.. المهم بقات الأمور غادية هاكة دوزات الامتحانات وجات الاولى..وسالا العام.. ومابقاتش تتشوفو ولا تيشوفها .. و واخا هكاك عمرها ماقدرات تنساه.. دوزات عطلة الصيف ف أغادير عند دار عمها. ..حاولات تفوج..تخرج ..تضحك..باش تنسى اللي كواها..لكن بلا فايدة. ..حبو كان تيجري بحال الدم فعروقها. الحاجة الوحيدة اللي كانت قادرة دير هي انها متضعفش قدامو.. وتمنات انها تنساه شي نهار.. المهم سالا الصيف وبدات القراية كان باقي ليها عام واحد و تشد الماستر ديالها.. وواحد النهار مشات لواحد البوتيك كبير فيه حوايج العيالات و الدراري الصغار..بغات تتقدا شي لبسات للبدية دلقراية..عزلات واحد اللبيسة ودخلات تقيسها..ومللي خرجات تشوف كيف جاتها..سمعات صوتها تتضحك. .. أه صوت نهى...نهى اللي كانت أعز ليها من أي حد وجرحاتها وغدراتها.. غير خرجات ولقاتها كرشها قدامها..يعني نهى قريبة تولد..جاية كتقدا لبيسة لبنتها او ولدها قبل ماتولد..وحداها رضا.. كانو تيضحكو وفرحانين.. ومللي شافوها جمعو الضحكة.. نهى تشوكات ..سكتت و حدرات راسها..أما رضا..بقا تيشوف ف عبير.. وعبير..بزز باش قدرت تتمالك أعصابها..وقالت: عبير: سلام..أستاذ رضا..سلام نهى..الله يفكك بخير..(مشات خلصات اللبيسة ودارت نظاظرها وشافت فيهم بابتسامة صفرا وخرجت).. عبير قدرات تكون قوية قدامهم لكنها ماقدراتش تكون قوية مع راسها.. مللي شافتهم تفكرات كلشي.. عبير بدات تتبكي بحرقة..وتتقول: عبير: علاش أسيدي ربي علاش!!!! واش هاد الماضي مغاديش يخليني نعيش هانية..واش انا مكتاب عليا نبقى نعاني كل ماشفتهم. ..قلبي تحرق بما فيه الكفاية والله بزاااف عليا هادشي.. مشات عبير للبلاصة اللي كانت تتمشي ليها قبل..اللي هي البحر..و بقات تتبكي..وتبكي..حتى شبعات..وحاولات انها تجمع قواها و تكمل طريقها ومترجعش..هادشي كان صعيب عليها ولكن خاصها تزيد..للقدام المهم مللي بدات القراية كانت بحال ديما تتشوف رضا كل نهار..ولكن مكتعطيهش فرصة يهضرها..مع انو مفقدش الامل انو يجي شي نهار و تسمح ليه..وواحد النهار تلقى ليها كيف العادة..وغير شافتو وهي تمشي تتزرب وهو يقوليها: رضا: فين غتهربي مني مازال!؟؟؟؟ عبير: أستاذ!! عافاك..عطيني اتساع.. رضا: عبير!! واش مازال تتبغيني؟؟ عبير: (بكل ثقة) هههه أكيد لا .. رضا: قوليلي الصراحة..(شد ليها ايدها وقرب منها)شوفيلي فعيني وقوليلي مبقيتيش تتبغيني.. عبير تلعتمات و يديها بداو تيترعدو..وتماك نزلات دمعة حزن من عينيها..طلقات منو بالجهد ومشات تتجري..وتتبكي.. رضا قال بفخاطرو: هي نتي باقا تتبغيني أ عبير..وانا كون كان الزمان تيرجع كون منغلطش هاد الغلطة ونتبع الغرائز ديالي..ونبغي وحدة لجسمها وجمالها لا غير..نتي أعبير جمال وروح.

ج9: رضا حس براسو بحال الى تغرم بعبير بلا مايحس..ولكن مكانش مأكد.. المهم عبير..مشات تتجري للبحر بحال ديما حيت هو المكان اللي تتلقى فيه راحتها وبقات تتقول: عبير:(وهي تتبكي) آه تنبغيك أرضا..تنبغيك..وهاد الحب معذبني..ومقادراش نحيدو من قلبي رغم هادشي اللي درتيلي..ولكن انت اللي مشيتي..وخليتيني..انت اللي خنتيني..انت..كنكره النهار اللي شفتك فيه..كنبغيك..ولكن خاصني ننساك..انت عندك حياة خرى وأسرة مخاصنيش نبغيك. ..اللي عارفاه هو قلبي تيتحرق من حبو ليك..ولكن أكيد غيجي النهار اللي تطفا فيه هاد النار... المهم عبير انسان..ماشي حجر..اكيد تيدوزو عليها لحظات تتفكر ذكرياتها مع رضا..تتحس بحبها ليه..ولكن خاصها تكمل..تتضعف و تتقوى.. الغد ليه دخلات المدرسة ودارت بحال الى ماواقع والو.. بقات هكاك سيمانة..تتهرب من رضا وهو مالاقيش الفرصة فين يتكلم معاها..غير تتخرج تتشد طاكسي.. المهم من بعد ديك السيمانة..رضا ماجاش يقريهم..بقاو واحد 3 يام تيتسناو..ماجاش..وهو يجي مدير المدرسة باش يهضر مع الطلبة بخصوص غياب الأستاذ رضا: المدير: معرفتش كيفاش غنقولكم هاد الخبر ولكن..خاصكم تعرفو شنو وقع مع الاستاذ رضا.. عبير: ياك لاباس أأستاذ؟؟ الطلبة: ياك لاباس..ياك لاباس..؟ المدير: أ..أ..أ..أستاذ رضا..توفات ليه مراتو حيت كانت تتولد ووقع ليها مشكل مقدروش يعتقوها..ولكن عتقو البنت.. عبير تصدماااااااااات وخرجات تتجري.. وهي تعيط ل رضا..حيت مبدلش نمرتو.. عيطات 3 مرات عاد جاوب..بنبرة كلها حزن و تيبكي.. رضا: أ..ألو.. عبير: رضا..انا عبير.. رضا: ع..عب..عبير!!!عرفتي اللي وقع..!؟ عبير: أه عرفت..البركة فراسك أرضا..صبر (وبدات تبكي).. رضا: متبكيش أعبير..شفتي.؟؟ ربي انتاقم ليك منا.. عبير: عافاك متقولش هكاك..انا عمرني ماتمنيت الموت لشي واحد مهما دار في..أه نتوما صدمتوني و جرحتوني. ولكن علمتوني بزاف ديال الحوايج..المهم تهلا فراسك وفبنتك راها محتاجة ليك..ونهى الله يرحمها..وتانت الله يسمح ليك. ..انا مسامحاك. ..بسلامة. رضا: نتي ملاك..ا عبير..شكرا بزاف حيت سمحتي ليها ولي..تانجي ويفوت هادشي ونهضرو مزيان.. مللي دازت شي 20 يوم جا للمدرسة..وغير شافتو عبير جا مشات عندو..قاليها نخرجو ونهضرو مزيان.. داكشي اللي كان غير سالاو القراية..مشاو للقهوة..القهوة اللي كانو تيجلسو فيها شحال هادي..قاليها: رضا: عقلتي على هاد القهوة؟؟ عبير: على انا نقدر ننساها!! رضا: المهم أعبير..انا اللي بغيتك تعرفيه هو أني ندمت بزاااف حيت تخليت عليك..انا بغيت نهى ولكن غير حيت عجبني جمالها. ..لا غير..ونتي معرفت بقيمتك تافات الفوت وكنت صافي غرقت. ..انا مافقت حتى دمرتك أعبير..كان خاصك نتي اللي تكوني مرتي ماشي نهى..انا عارف اني منستاهل منك تا كلمة زوينة. ..ولكن اللي فقلبي قلتو ليك..انا..انا تنبغيك وبزاف..واخا عارفك مغاتيقيش ولكن هادي هي الحقيقة.. عبير: واش تتشوفني تنرضع صبعي ..انا عارفاك شفتي نهى مشات الله يرحمها وبغيتي تجي تتفلا عليا تاني..ولكن كون هاني انا فقت من الgلبة ..اوا شنو سميتي بنتك..والله حتى بقات في مسيكينة.. رضا: عبير عبير: نعام.. رضا: لا سميتها عبير.. عبير: ك..كيفاش؟ رضا:اه..باش تعرفي معزتك..نهى ماتت الله يرحمها..وهاد البنية را خليتها عند دارنا تنشوف شنو ندير

ج10: والأخير: عبير: معندك ماتدير من غير أنك تربي بنتك وتقابلها..وتهلا فيها .. رضا: داكشي اللي كاين.. المهم عبير سمحات ل رضا على كلشي وهادشي خلاها ترتاح نفسيا..واخا مقدرتش تحيد حبو من قلبها..لكن على الاقل النار اللي فقلبها طفات مللي عرفاتو ندم..واكيد متيقاتش انو تيميل ليها..واخا كلشي محاولاتو لإقناعها.. ولكن قالتلو انا نقدر نكون ليك أخت وصديقة لا غير.. بقاو هكاك..حتى سالا العام..و عبير كانت فرحانة وحتى رضا فرح ليها حيت خدات الماستر..وولات مهندسة..وخداتها بنقطة عالية تتخول ليها تخدم فأي بلاصة .. المهم مللي تخرجات..قاليها رضا انا عارض عليك للغدا ..بمناسبة النجاح ديالك..اش قلتي؟؟ عبير: موافقة..يله نمشيو.. رضا: يله.. مشاو لواحد المطعم و مللي تغذاو..وهو يقوليها: رضا: فراسك اليوم عبير بنتي دارت 9 شهور..بدات تتحبو و تتنبش..هههه عبير: ههه مسيكينة..الله يخليها ليك.. وقف رضا قدام الناس اللي فالمطعم وقال ليهم: رضا: عافاكم سمعوني واحد الشوية..انا قبل 3 سنين..جرحت هاد البنت خنتها وتزوجت صاحبتها..وهي عانات بزاف من هادشي..وربي جازاني على فعلتي و خلاني نتحرم من مرتي و بنتي تتيتم..و انا اليوم باغي نقول لهاد المرا اني نادم على كلشي واني باغيها للزواج..تكون ام بنتي وشريكة حياتي.. عبير: واش حماقيتي؟؟ رضا: قوليلي موافقة..عافاك.. عبير: ماشي بهاد السهولة.. رضا: انا عارفك تتبغيني غير ثيقي في هاد المرة.. عبير: واخا..غنتيق فيك هاد المرة وكنتمنى تكون ثقتي فمحلها.. رضا فرح وبدا ينقز بالفرحة..كان باين عليه الندم..وباين عليه حبو الصادق ليها.. جا خطبها من دارهم..وتزوجو ولات عبير الصغيورة بحال بنتها..تماما. .. وولفاتها بزاااااف... وكانت صدمة عبير كبيرة فاش بغاو يولدو ولقات راسها متتولدش..أي هي اللي منها العيب.. ولكن رضات بقضاء الله ورضا تاهو رضا بهادشي اللي قسم ليهم الله وعبير الصغيورة ملات عليهم حياتهم..وعاشو فسعادة وهناء.. العبرة: عسى أن تكرهوا شيئا وهو خير لكم... عبير مكانتش غتكون أم كون ماوقعش ليها اللي وقع.