سيكار معمر كفتة صدر الدجاج وخضرة والشعرية الصينية من عند صالحة

 سيكار معمر كفتة صدر الدجاج

 وخضرة والشعرية الصينية

من عند صالحة

السلام عليكم

هاد الشهيوة  درتها بكفتة صدر الدجاج

 وخضرة والشعرية الصينية

أصل هاد الوصفة هو آسيوي

 واحنا المغاربة دائماً كنزيدو إضافات من عندنا

 المهم هاد الشهيوة دائماً حاضرة عندي في رمضان

 وحتى بلا رمضان 

لان ولادي وزوجي وانا كتعجبنا بزاف المذاق والشكل 

 سيكار معمر كفتة صدر الدجاج وخضرة والشعرية الصينية

 انا حاولت قدر الإمكان نوضح اكثر بالصور ونتمنى تعجبكم .

المقادير:

كفتة ديال 2 صدر دجاج ، 3 فلفل بألوانه ، بصلة كبيرة ،

 6 ديال خزو ،1 بورو ،

وكل الخضر قطعتها مربعات صغار وبنفس الشكل ،

 توابل : 

تحميرة والابزار والسكنجبير والخرقوم والملح 

وكنور ديال الخضرة والكاري هذا ضروري 

هو وصلصة الصوجا   ولي كيعجبو الحار راه كتجي فيه .

لأنهم كيعطيو المذاق.

 ورقة البسطيلة انا استعملت ورقة خاصة بالسيكار

ولكن ورقة البسطيلة حتى هي كنستعملها ، 

شوية دقيق مع الماء كنسد بيه السيكار منين كنعمرهم،

 الطريقة:

 كنقلي الخضرة في شوية الزيت وكنقلي في مقلاة اخرى كفتة الدجاج 

حتى تفرتت عاد كنزيدها تكمل طيابها مع الخضرة

 ونخلي كل شيء يتقلى مزيان ثم كنزيد ليهم التوابل

 ونخلي كل شيء يطيب مزيان

 منين نطفي العافية كنزيد الشعرية الصينية

 ونخلط كل شيء ودائما انا كيعجبني ندوق

 وإلا لقيت خاصه مذاق كنزيد الكاري والصوجا

 حتى نلقا المذاق لي عجبني،

 ثم نخلي الحشوة في شي شبكة تقطر مزيان من الزيت

ونبدا نعمر في السيكار

 راه الطريقة مشروحة بالصور

 وحتى طريقة الحفظ في المجمد انا كنديرها في صينية

 وبين طبقة وطبقة كندير بلاستيك غذائي باش يفصلهم 

وكنخليهم يتجمدو عاد كنديرهم في بلاستيكات

 ونهار تجبدوهم باش تقليهم سخني زيت غزير مزيان

 وقليهم مجمدين ونقصي ليهم العافية باش

 ما يطرطقوش راه كيطيبو ما تخافوش

 الا خليتيهم حتى يدوبو كيطرطقو في الزيت، 

وبصحتكم وراحتكم ، 

صالحة ام امين و مروة